पुणे शिक्षक मतदार संघमहाराष्ट्र राजकारणराजकीय

इंदापूरमध्ये दत्तात्रय सावंत यांच्या प्रचाराचा नारळ; शिक्षक बांधवांशी साधला थेट संवाद

पुणे शिक्षक मतदारसंघ निवडणुकीच्या पार्श्वभूमीवर इंदापूर तालुक्यात प्रचाराला वेग

इंदापूर | दिनप्रभा प्रतिनिधी

पुणे विभाग शिक्षक मतदारसंघाच्या आगामी निवडणुकीच्या पार्श्वभूमीवर माजी आमदार दत्तात्रय सावंत यांनी इंदापूर तालुक्यात प्रचाराला सुरुवात करत शिक्षक बांधवांशी थेट संवाद साधला. इंदापूर तालुक्यातील श्री इंद्रेश्वर मंदिरात दर्शन घेतल्यानंतर शिक्षक बांधव, कार्यकर्ते आणि समर्थकांच्या उपस्थितीत प्रचाराचा पुढील टप्पा सुरू करण्यात आला.

यावेळी इंदापूर तालुक्यातील शिक्षक बांधव-भगिनींशी प्रत्यक्ष संवाद साधत आगामी वाटचालीबाबत चर्चा करण्यात आली. शिक्षकांच्या विविध प्रश्नांसाठी सातत्याने आवाज उठवण्याचा निर्धार यावेळी व्यक्त करण्यात आला.

दत्तात्रय सावंत यांनी आपल्या सोशल मीडिया पोस्टमध्ये, शिक्षक बांधवांचा विश्वास आणि साथ हीच आपली ताकद असल्याचे नमूद केले आहे. इंदापूर तालुक्यातील शिक्षकांकडून मिळालेला उत्स्फूर्त प्रतिसाद, प्रेम आणि आशीर्वाद यामुळे आगामी प्रचाराला नवी ऊर्जा मिळाल्याचे त्यांनी म्हटले आहे.

दरम्यान, सावंत यांनी यापूर्वी पुणे विभाग शिक्षक मतदारसंघाचे प्रतिनिधित्व केले आहे. 2014 मध्ये ते या मतदारसंघातून विजयी झाले होते.  आगामी निवडणुकीसाठी त्यांनी पुन्हा तयारी सुरू केली असून, त्यांच्या उमेदवारीबाबत भाजपसह विविध राजकीय पक्षांशी चर्चा सुरू असल्याचे त्यांनी अलीकडे सांगितले आहे.

पुणे विभाग शिक्षक मतदारसंघात पुणे, सोलापूर, सांगली, सातारा आणि कोल्हापूर या पाच जिल्ह्यांचा समावेश आहे. 2026 च्या निवडणुकीसाठी 23 ऑक्टोबर रोजी मतदान होणार असून 27 ऑक्टोबरला मतमोजणी होणार आहे.

इंदापूरमधील या दौऱ्यामुळे सावंत यांच्या प्रचाराला शिक्षक मतदारसंघातील विविध भागांत अधिक वेग येण्याची चिन्हे आहेत. शिक्षकांच्या प्रश्नांवर संवाद, संघटनात्मक संपर्क आणि मतदारांशी थेट भेटी यावर त्यांच्या आगामी प्रचाराचा भर राहणार असल्याचे त्यांच्या पोस्टमधून दिसून येते.

“चला, एकजुटीने पुढे जाऊया… शिक्षकांच्या हक्कासाठी हा लढा अधिक बळकट करूया!” असा संदेश सावंत यांनी आपल्या समर्थकांना दिला आहे.

Related Articles

Back to top button