कोल्हापूरगोकुळ दुध संघग्रामीण महाराष्ट्रराजकीयस्थानिक बातमी

बघून घेतो’ अशा धमक्या चालणार नाहीत, मी पण पाटील आहे! गोकुळच्या निकालानंतर सतेज पाटलांचा चौफेर हल्लाबोल; चंद्रकांतदादा, धनंजय महाडिक आणि हसन मुश्रीफांना सुनावले!

कोल्हापूर | दिनप्रभा प्रतिनिधी

कोल्हापूर जिल्ह्याच्या राजकारणात महत्त्वाची मानली जाणारी गोकुळ दूध संघाच्या अध्यक्षपदाची निवडणूक पार पडली असली, तरी या निवडणुकीनंतर राजकीय संघर्ष थांबण्याऐवजी अधिकच तीव्र होताना दिसत आहे. अध्यक्षपदाच्या निवडणुकीत महायुतीचे राजेश पाटील यांनी बाजी मारल्यानंतर काँग्रेस आमदार सतेज पाटील यांनी विरोधकांवर जोरदार हल्लाबोल केला आहे. मंत्री चंद्रकांत पाटील, खासदार धनंजय महाडिक आणि मंत्री हसन मुश्रीफ यांच्यावर त्यांनी वेगवेगळ्या मुद्द्यांवरून निशाणा साधला. धमकीच्या भाषेपासून ते भीमा साखर कारखाना आणि गोकुळमधील शासन नियुक्त संचालकांच्या मुद्द्यापर्यंत अनेक विषयांवर सतेज पाटील यांनी आपली भूमिका स्पष्ट केली.

‘बघून घेतो’ अशा धमक्या चालणार नाहीत; मी पण पाटील आहे!

गोकुळच्या निवडणुकीनंतर मंत्री चंद्रकांत पाटील यांनी केलेल्या टीकेला उत्तर देताना सतेज पाटील यांनी आक्रमक भूमिका घेतली. ‘सरकारी यंत्रणेचा गैरवापर करून धमक्या देऊ नका. मी पण पाटील आहे, घाबरणार नाही. बघून घेतो, अशा धमक्या चालणार नाहीत,’ अशा शब्दांत त्यांनी प्रत्युत्तर दिले.

राजकीय मतभेद असू शकतात; मात्र धमक्यांच्या माध्यमातून दबाव निर्माण करण्याचा प्रयत्न स्वीकारला जाणार नाही, असा स्पष्ट संदेश त्यांनी दिला. त्यांच्या या वक्तव्यामुळे चंद्रकांत पाटील आणि सतेज पाटील यांच्यातील राजकीय संघर्ष पुन्हा चर्चेच्या केंद्रस्थानी आला आहे.

‘मला साहेब नाही, बंटी पाटील म्हणूनच लोकांच्या हृदयात राहायचंय!’

चंद्रकांत पाटील यांनी ‘बंटीचा बंटी साहेब झाला नाही,’ अशी टिप्पणी केल्याचा संदर्भ देत सतेज पाटील यांनी त्याला अनोख्या शब्दांत उत्तर दिले.

‘चंद्रकांतदादा म्हणाले, बंटीचा बंटी साहेब झाला नाही; पण मला सांगायचं आहे की लोकांच्या हृदयात मला बंटी पाटील म्हणूनच राहायचं आहे, साहेब नाही,’ असे सतेज पाटील म्हणाले.

या वक्तव्यातून त्यांनी आपल्या राजकीय ओळखीपेक्षा सामान्य जनतेशी असलेले नाते महत्त्वाचे असल्याचे अधोरेखित केले. त्यांच्या या प्रतिक्रियेची कोल्हापूरच्या राजकीय वर्तुळात विशेष चर्चा सुरू झाली आहे.

धनंजय महाडिकांना भीमा साखर कारखान्यावरून घेरले!

खासदार धनंजय महाडिक यांच्यावर टीका करताना सतेज पाटील यांनी भीमा सहकारी साखर कारखान्याचा मुद्दा उपस्थित केला. ‘धनंजय महाडिक, आधी भीमा साखर कारखान्यावर फेरी मारा. कामगारांना पगार नाही, कारखान्यावर जप्ती आहे,’ अशा शब्दांत त्यांनी महाडिक यांना लक्ष्य केले.

भीमा साखर कारखान्यातील कामगारांचे वेतन आणि कारखान्याच्या आर्थिक परिस्थितीचा मुद्दा उपस्थित करत त्यांनी महाडिक यांच्यावर प्रश्नांची सरबत्ती केली. गोकुळच्या निवडणुकीवरून सुरू असलेल्या राजकीय टीकेला उत्तर देताना त्यांनी विरोधकांनी स्वतःच्या संस्थांमधील परिस्थितीकडेही लक्ष द्यावे, असा अप्रत्यक्ष टोला लगावला.

हसन मुश्रीफांना २०१४ मधील उमेश आपटेंची आठवण!

मंत्री हसन मुश्रीफ यांच्यावरही सतेज पाटील यांनी जोरदार निशाणा साधला. ‘२०१४ साली उमेश आपटे यांची मदत झाली नसती तर काय झालं असतं, हे हसन मुश्रीफ यांनी लक्षात ठेवावं,’ असे वक्तव्य त्यांनी केले.

याशिवाय गोकुळ दूध संघातील शासन नियुक्त चार संचालकांच्या मुद्द्यावरूनही त्यांनी मुश्रीफ यांच्यावर टीका केली. शासनाची व्यवस्था कशा पद्धतीने वापरता येते, हे हसन मुश्रीफ यांनी दाखवून दिल्याचा आरोप सतेज पाटील यांनी केला.

‘वटहुकूम काढून कोणत्याही संस्थेची सत्ता काबीज करता येऊ शकते. त्यामुळेच आम्ही या निर्णयाला विरोध करत होतो,’ असे ते म्हणाले.

गोकुळसारख्या सहकारी संस्थांमध्ये लोकशाही पद्धतीने निवडून आलेल्या संचालक मंडळाचे महत्त्व कायम राहिले पाहिजे. शासन नियुक्त संचालकांच्या माध्यमातून संस्थेच्या सत्तासमीकरणावर परिणाम होऊ शकतो, अशी भूमिका सतेज पाटील यांनी मांडली.

गोकुळच्या निकालानंतर राजकीय संघर्षाला नवे वळण!

गोकुळ दूध संघाच्या अध्यक्षपदाच्या निवडणुकीत महायुतीचे राजेश पाटील यांनी १६ विरुद्ध १३ मतांनी विजय मिळवला. या निकालानंतर कोल्हापूरच्या राजकारणात आरोप-प्रत्यारोपांना वेग आला आहे. निवडणुकीतील पराभव, शासन नियुक्त संचालकांचा मुद्दा, सहकारी संस्थांमधील सत्तासंघर्ष आणि नेत्यांमधील वैयक्तिक टीका यामुळे गोकुळची निवडणूक आता केवळ दूध संघापुरती मर्यादित राहिलेली नाही.

सतेज पाटील यांनी एकाच वेळी चंद्रकांत पाटील, धनंजय महाडिक आणि हसन मुश्रीफ यांना लक्ष्य करत अनेक राजकीय मुद्दे उपस्थित केले आहेत. त्यामुळे आगामी काळात या तिन्ही नेत्यांकडून काय प्रतिक्रिया येणार, तसेच गोकुळमधील सत्तासंघर्षाला कोणते नवे वळण मिळणार, याकडे संपूर्ण कोल्हापूर जिल्ह्याचे लक्ष लागले आहे.

गोकुळचा निकाल लागला, अध्यक्षपदाचा फैसला झाला; मात्र कोल्हापूरच्या राजकारणातील संघर्ष अद्याप संपलेला नाही. उलट सतेज पाटील यांच्या चौफेर हल्लाबोलमुळे राजकीय वातावरण आणखी तापण्याची चिन्हे आहेत.

श्री. डॉ. सतीश दाभाडे (दिनप्रभा कोल्हापूर विभागीय संपादक )

दिनप्रभा न्यूज पोर्टल
सत्य, समाज, संस्कार

संपादक : श्री. डॉ. किरण दिनकर बोधले
नोंदणी क्र.MH-32-0302295
ई-मेल : dinprabhanews@gmail.com

Related Articles

Back to top button