खरसोळीत क्रीडा महोत्सवाचा दणदणीत सोहळा संपन्न; विजेत्या संघांसह सर्व खेळाडूंचा रोख बक्षिसे देऊन गौरव!

खरसोळी (ता. पंढरपूर) : ग्रामीण भागातील क्रीडा संस्कृतीला प्रोत्साहन देण्यासाठी आणि युवकांमधील क्रीडाभावना, जिद्द व उत्साह वाढविण्याच्या उद्देशाने खरसोळी येथे आयोजित क्रिकेट स्पर्धेचा बक्षीस वितरण सोहळा उत्साहात पार पडला. या स्पर्धेत उत्कृष्ट कामगिरी करणाऱ्या विजेत्या संघांसह सहभागी सर्व खेळाडूंना रोख बक्षिसे देऊन गौरविण्यात आले. त्यामुळे खेळाडूंमध्ये आनंदाचे आणि उत्साहाचे वातावरण पाहायला मिळाले.
या क्रिकेट स्पर्धेत एकूण सहा सामने खेळविण्यात आले. प्रत्येक सामन्यात खेळाडूंनी विजयासाठी चांगलीच झुंज दिली. अंतिम फेरीतील सामन्यात ‘एलिट वॉरियर्स’ संघाने बाजी मारत प्रथम क्रमांक पटकावला.
विजेत्या संघांवर बक्षिसांचा वर्षाव!
स्पर्धेतील प्रथम क्रमांक पटकावणाऱ्या ‘एलिट वॉरियर्स’ संघाला सुभेदार मेजर हनुमंत काळे यांच्या वतीने ११ हजार १११ रुपयांचे रोख पारितोषिक देण्यात आले.





तसेच ‘अंबिका नगर २’ संघाने विजय मिळवत ७ हजार ७७७ रुपयांचे बक्षीस पटकावले. हे बक्षीस उपसरपंच अमर पवार व अतुल पवार यांच्या हस्ते प्रदान करण्यात आले.
याशिवाय ‘रोकडोबा क्रिकेट क्लब’ संघाने ५ हजार ५५५ रुपयांचे रोख पारितोषिक मिळवले. या बक्षिसाचे प्रायोजक पंढरपूर फार्मसी मेडिकलचे शिवराज पाटील होते.
सहभागी खेळाडूंनाही प्रोत्साहनपर बक्षीस!
या स्पर्धेचे विशेष वैशिष्ट्य म्हणजे केवळ विजेत्या संघांचाच गौरव न करता इतर सामन्यांमध्ये सहभागी झालेल्या खेळाडूंनाही प्रोत्साहन देण्यात आले. एकूण सहा सामन्यांपैकी उर्वरित तीन सामन्यांमध्ये खेळलेल्या खेळाडूंसाठी सुभेदार मेजर हनुमंत काळे यांच्या वतीने ५ हजार रुपयांचे विशेष बक्षीस व सन्मान देण्यात आला.



ग्रामीण भागातील खेळाडूंना प्रोत्साहन मिळावे, त्यांच्यातील गुणवत्ता विकसित व्हावी आणि भविष्यात त्यांना मोठ्या स्तरावर खेळण्याची संधी मिळावी, या भावनेतून हा उपक्रम राबविण्यात आला.
आयोजकांचाही विशेष सत्कार
या क्रिकेट स्पर्धेचे यशस्वी आयोजन करण्यासाठी परिश्रम घेतलेल्या सर्व संयोजक व आयोजकांचाही मान्यवरांच्या हस्ते विशेष सत्कार करण्यात आला. या सोहळ्याला गावातील ग्रामस्थ, क्रीडाप्रेमी, युवक आणि मोठ्या संख्येने खेळाडू उपस्थित होते.
ग्रामीण भागातील तरुणांना मोबाईल आणि इतर गोष्टींपासून दूर ठेवून मैदानी खेळांकडे आकर्षित करण्यासाठी अशा क्रीडा स्पर्धांचे आयोजन महत्त्वाचे ठरत आहे. विजेत्या संघांसह सर्व सहभागी खेळाडूंना प्रोत्साहन देण्याच्या या उपक्रमामुळे खरसोळीतील क्रीडाप्रेमींमध्ये आनंदाचे वातावरण निर्माण झाले आहे.
दिनप्रभा ग्रामीण प्रतिनिधी : श्री. आकाश पवार




