राम सातपुते यांच्या उमेदवारीवर हरकत; जिल्हा बँकेच्या निवडणुकीत भाजप विरुद्ध मोहिते-पाटील संघर्षाला नवी धार!

तीन जणांकडून उमेदवारी अर्जावर आक्षेप; दाखला आणि सभासद यादीतील फेरफाराचा मुद्दा ऐरणीवर, निवडणूक निर्णय अधिकाऱ्यांच्या निर्णयाकडे लक्ष!
सोलापूर | दिनप्रभा प्रतिनिधी
सोलापूर जिल्हा मध्यवर्ती सहकारी बँकेची निवडणूक आता चांगलीच रंगात आली असून, ही निवडणूक केवळ बँकेच्या संचालक मंडळापुरती मर्यादित न राहता जिल्ह्यातील राजकीय वर्चस्वाची प्रतिष्ठेची लढाई बनत चालली आहे. माजी आमदार राम सातपुते यांच्या उमेदवारी अर्जावर हरकत घेण्यात आल्याने जिल्ह्याच्या राजकीय वर्तुळात मोठी खळबळ उडाली आहे. त्यामुळे आगामी काळात भाजप आणि मोहिते-पाटील गटातील संघर्ष आणखी तीव्र होण्याची शक्यता व्यक्त केली जात आहे.
सातपुते यांच्या उमेदवारीवर तीन जणांचा आक्षेप!
राम सातपुते यांच्या उमेदवारी अर्जावर जयंत साळे, नाना नाईकनवरे आणि मल्हारी ढोबळे यांनी हरकत घेतली आहे. नातेपुते येथील समाजभूषण नानासाहेब देशमुख विकास सोसायटीचे संचालक असल्याचा दाखला तसेच सभासद यादीतील फेरफाराचा मुद्दा उपस्थित करण्यात आला आहे. संबंधित दाखला बनावट असल्याचा आरोप हरकतदारांकडून करण्यात आला आहे.
या प्रकरणात राम सातपुते यांच्या वतीने अॅड. उमेश मराठे यांनी बाजू मांडली आहे. त्यामुळे आता निवडणूक निर्णय अधिकारी या हरकतींवर काय निर्णय देतात, याकडे सर्वांचे लक्ष लागले आहे. सातपुते यांची उमेदवारी वैध ठरते की त्यांना निवडणुकीच्या प्रक्रियेत अडचणींचा सामना करावा लागतो, हे निर्णयानंतरच स्पष्ट होणार आहे.
मोहिते-पाटील गटासाठी प्रतिष्ठेची निवडणूक!
खासदार धैर्यशील मोहिते-पाटील यांच्यासाठी जिल्हा बँकेची निवडणूक अत्यंत महत्त्वाची मानली जात आहे. विधानपरिषद निवडणुकीनंतर जिल्ह्यातील सहकार क्षेत्रात आपले राजकीय वजन कायम ठेवण्याचे मोठे आव्हान मोहिते-पाटील गटासमोर आहे.
राम सातपुते यांनी यापूर्वीच खासदार धैर्यशील मोहिते-पाटील यांच्यावर टीका करत जिल्हा बँकेच्या निवडणुकीतही त्यांचा पराभव होईल, असा दावा केला होता. त्यामुळे आता सातपुते यांच्या उमेदवारीवर आलेली हरकत आणि त्यातून निर्माण झालेल्या राजकीय चर्चेला विशेष महत्त्व प्राप्त झाले आहे.
भाजपची ताकद वाढणार की मोहिते-पाटील गटाचे गणित जुळणार?
दुसरीकडे, भाजपनेही जिल्हा बँकेच्या निवडणुकीत आपली ताकद दाखवण्यास सुरुवात केली आहे. भाजपच्या तीन जागा यापूर्वीच बिनविरोध झाल्याने पक्षाला सुरुवातीलाच महत्त्वपूर्ण यश मिळाले आहे. पालकमंत्री जयकुमार गोरे आणि माजी आमदार राम सातपुते यांची भूमिका या निवडणुकीत निर्णायक ठरू शकते.
तर मोहिते-पाटील गटाकडूनही विविध राजकीय नेत्यांशी चर्चा आणि संभाव्य आघाड्यांची जुळवाजुळव सुरू असल्याची चर्चा आहे. संजयमामा शिंदे यांच्यासह इतर नेत्यांची भूमिका काय राहणार, यावरही निवडणुकीची पुढील राजकीय समीकरणे अवलंबून असतील.
२३८ अर्ज दाखल; ४३ अर्जांवरील हरकतींची सुनावणी!
जिल्हा बँकेच्या निवडणुकीसाठी एकूण २३८ उमेदवारी अर्ज दाखल झाले आहेत. त्यापैकी १८१ अर्ज मंजूर करण्यात आले असून, १४ अर्ज नामंजूर झाले आहेत. तर ४३ अर्जांवरील हरकतींच्या अनुषंगाने सुनावणी झाली आहे. पात्र आणि अपात्र उमेदवारांची अंतिम यादी जाहीर झाल्यानंतर निवडणुकीचे खरे चित्र स्पष्ट होणार आहे.
सातपुते यांच्या उमेदवारीचा निर्णय ठरणार राजकीयदृष्ट्या महत्त्वाचा!
राम सातपुते यांच्या उमेदवारीवरील हरकतींचा निकाल हा केवळ एका उमेदवाराच्या राजकीय भवितव्याचा प्रश्न राहिलेला नाही, तर त्याचे परिणाम जिल्ह्यातील भाजप आणि मोहिते-पाटील गटाच्या राजकीय समीकरणांवरही होऊ शकतात.
एकीकडे भाजपने बिनविरोध जागांच्या माध्यमातून सुरुवातीची आघाडी घेतली आहे, तर दुसरीकडे मोहिते-पाटील गटाकडून राजकीय ताकद एकवटण्याचे प्रयत्न सुरू असल्याची चर्चा आहे. त्यामुळे सोलापूर जिल्हा मध्यवर्ती सहकारी बँकेच्या निवडणुकीत कोण बाजी मारणार? राम सातपुते यांची उमेदवारी टिकणार का? आणि मोहिते-पाटील गट भाजपला कशी टक्कर देणार? या प्रश्नांची उत्तरे आगामी घडामोडींमधून समोर येणार आहेत.
सोलापूर जिल्हा बँकेच्या निवडणुकीत आता सहकारापेक्षा राजकारणाचीच रंगत अधिक वाढणार, हे मात्र निश्चित!
दिनप्रभा न्यूज पोर्टल – सत्य, समाज, संस्कार




