डॉ. द्वारकानाथ कोटणीस जयंतीनिमित्त सोलापूर महापालिकेतर्फे अभिवादन; उपमहापौर ज्ञानेश्वरी देवकर यांच्या हस्ते पुष्पहार अर्पण

सोलापूर | दिनप्रभा प्रतिनिधी
सोलापूरचे सुपुत्र आणि आंतरराष्ट्रीय स्तरावर मानवसेवेचा आदर्श निर्माण करणारे थोर डॉक्टर डॉ. द्वारकानाथ कोटणीस यांच्या जयंतीनिमित्त सोलापूर महानगरपालिकेच्या वतीने विविध ठिकाणी त्यांच्या पुतळ्यास व प्रतिमेस पुष्पहार अर्पण करून अभिवादन करण्यात आले. त्यांच्या त्यागमय जीवनाचे आणि मानवतेसाठी दिलेल्या योगदानाचे यावेळी स्मरण करण्यात आले.
साहित्यरत्न अण्णाभाऊ साठे चौक येथील डॉ. कोटणीस यांच्या पुतळ्यास तसेच सोलापूर महानगरपालिकेतील कौन्सिल हॉलमध्ये असलेल्या त्यांच्या प्रतिमेस उपमहापौर ज्ञानेश्वरी देवकर यांच्या हस्ते पुष्पहार अर्पण करण्यात आला.
या कार्यक्रमास महिला व बालकल्याण समितीच्या सभापती निर्मला जंगम, नगरसेवक विनोद भोसले, कामगार कल्याण अधिकारी अजितकुमार खानसोळे, हरीष जंगम, महेश देवकर, दोतुल, अमंगी यांच्यासह महानगरपालिकेचे अधिकारी व कर्मचारी उपस्थित होते.
चीनमध्ये जाऊन केली मानवसेवा
डॉ. द्वारकानाथ कोटणीस यांनी चीन-जपान युद्धाच्या काळात चीनमध्ये जाऊन जखमी सैनिकांवर उपचार केले. प्रतिकूल परिस्थितीतही त्यांनी वैद्यकीय सेवा देण्याचे आपले कर्तव्य निष्ठेने पार पाडले. स्वतःच्या सुखसोयींपेक्षा रुग्णसेवा आणि मानवतेला प्राधान्य देणारे त्यांचे कार्य आजही प्रेरणादायी मानले जाते.
सोलापूरच्या मातीत जन्मलेल्या डॉ. कोटणीस यांनी आपल्या निःस्वार्थ सेवेतून भारताचे नाव आंतरराष्ट्रीय स्तरावर उंचावले. त्यांच्या कार्यामुळे भारत आणि चीन यांच्यातील मैत्रीच्या इतिहासातही त्यांचे नाव विशेष आदराने घेतले जाते. त्यांचे जीवन त्याग, सेवाभाव, कर्तव्यनिष्ठा आणि मानवतेच्या मूल्यांची जाणीव करून देणारे आहे.
सिव्हिल हॉस्पिटल परिसरातही अभिवादन
दरम्यान, सिव्हिल हॉस्पिटल परिसरातील डॉ. द्वारकानाथ कोटणीस यांच्या पुतळ्यास महिला व बालकल्याण समितीच्या सभापती निर्मला जंगम यांच्या हस्ते पुष्पहार अर्पण करून अभिवादन करण्यात आले. यावेळी समुदाय संघटक किरण चंदनशिवे, गुरुराज कानडे यांच्यासह इतर कर्मचारी उपस्थित होते.
डॉ. कोटणीस यांच्या जयंतीनिमित्त आयोजित या अभिवादन कार्यक्रमातून त्यांच्या मानवतावादी कार्याचा वारसा नव्या पिढीपर्यंत पोहोचविण्याचा संदेश देण्यात आला. रुग्णसेवा, समाजसेवा आणि निःस्वार्थ मानवसेवा हीच डॉ. कोटणीस यांना वाहिलेली खरी आदरांजली असल्याची भावना या निमित्ताने व्यक्त झाली.
दिनप्रभा न्यूज पोर्टल
सत्य, समाज, संस्कार
श्री. गणेश दत्तात्रय शिंदे
सोलापूर विभागीय कार्यकारी संपादक
📱 मोबाईल : 8605767640




