जिल्हा बँकपंढरपूरराजकीयस्थानिक बातमी

सोलापूर जिल्हा बँकेच्या निवडणुकीत घाडगे कुटुंबाची एन्ट्री! अर्चना घाडगे आणि अभिजीत घाडगेंनी दाखल केले उमेदवारी अर्ज

महिला प्रतिनिधी आणि ‘ड’ गटातून उमेदवारी; अर्ज दाखल करताना भाजपच्या प्रमुख नेत्यांसह कार्यकर्त्यांची उपस्थिती

पंढरपूर | दिनप्रभा ग्रामीण प्रतिनिधी ( श्री. आकाश पवार )

सोलापूर जिल्हा मध्यवर्ती सहकारी बँकेच्या निवडणुकीचे वातावरण तापू लागले असून, पंढरपूर तालुक्यातून उमेदवारी अर्ज दाखल करण्याच्या प्रक्रियेला वेग आला आहे. सुस्ते येथील घाडगे कुटुंबानेही या निवडणुकीत आपली दावेदारी सादर केली आहे. पंढरपूर कृषी उत्पन्न बाजार समितीचे माजी सभापती दिलीप (आप्पा) घाडगे यांच्या पत्नी अर्चना घाडगे आणि त्यांचे चिरंजीव तथा भाजपचे करकंब सर्कल उपाध्यक्ष अभिजीत (चिन्मय) घाडगे यांनी सोलापूर जिल्हा बँकेच्या निवडणुकीसाठी आपले उमेदवारी अर्ज दाखल केले आहेत.

अर्चना घाडगे यांनी महिला प्रतिनिधी गटातून, तर अभिजीत घाडगे यांनी ‘ड’ गटातून उमेदवारी अर्ज सादर केला आहे. त्यामुळे जिल्हा बँकेच्या निवडणुकीत पंढरपूर तालुक्यातील राजकीय घडामोडींना महत्त्व प्राप्त झाले आहे.

अर्ज दाखल करताना भाजप नेत्यांची उपस्थिती

अर्चना घाडगे आणि अभिजीत घाडगे यांनी उमेदवारी अर्ज दाखल करताना भाजपचे युवा नेते प्रणव परिचारक, महेश परिचारक, पंढरपूर कृषी उत्पन्न बाजार समितीचे माजी उपसभापती लक्ष्मण धनवडे, भगवान चौगुले, तानाजी वाघमोडे, भाजपचे तालुकाध्यक्ष सुभाष मस्के आणि माजी जिल्हा परिषद सदस्य हरीभाऊ गावंधरे यांच्यासह अनेक कार्यकर्ते उपस्थित होते.

प्रमुख नेते आणि कार्यकर्त्यांच्या उपस्थितीत उमेदवारी अर्ज दाखल करण्यात आल्याने या घडामोडीची पंढरपूर तालुक्यात चर्चा सुरू झाली आहे.

जिल्हा बँकेच्या निवडणुकीकडे राजकीय वर्तुळाचे लक्ष

सोलापूर जिल्हा मध्यवर्ती सहकारी बँक ही जिल्ह्यातील सहकार क्षेत्रातील महत्त्वाची संस्था मानली जाते. त्यामुळे या बँकेच्या निवडणुकीला राजकीय आणि सहकार क्षेत्रात विशेष महत्त्व असते. विविध गटांकडून उमेदवारी अर्ज दाखल होत असल्याने निवडणुकीतील समीकरणे कशी आकार घेतात, याकडे सर्वांचे लक्ष लागले आहे.

पंढरपूर तालुक्यातून अर्चना घाडगे आणि अभिजीत घाडगे यांनी स्वतंत्र गटांतून उमेदवारी अर्ज दाखल केल्याने त्यांच्या उमेदवारीकडेही लक्ष वेधले गेले आहे. आगामी काळात निवडणुकीचे चित्र स्पष्ट होत असताना स्थानिक राजकीय समीकरणांमध्ये कोणते बदल होतात, हे पाहणे महत्त्वाचे ठरणार आहे.

दिनप्रभा ग्रामीण प्रतिनिधी ( श्री. आकाश पवार )       दिनप्रभा न्यूज पोर्टल — सत्य, समाज, संस्कार

Related Articles

Back to top button