सोलापूरच्या राजमुद्रा युवक प्रतिष्ठानला ‘उत्कृष्ट गणेशोत्सव २०२६’ चा प्रथम क्रमांकाचा पुरस्कार!

डीजे-डॉल्बी, बॅनरबाजीला फाटा; सामाजिक उपक्रम आणि शिस्तबद्ध आयोजनाची दखल
सोलापूर | दिनप्रभा प्रतिनिधी
सोलापूर शहरातील लक्ष्मी पेठ येथील न्यू लक्ष्मी चाळ परिसरातील लोकसेवा बहुद्देशीय सामाजिक मंडळ संचलित राजमुद्रा युवक प्रतिष्ठानला ‘उत्कृष्ट गणेशोत्सव २०२६’ चा प्रथम क्रमांकाचा पुरस्कार जाहीर झाला आहे. गणेशोत्सवादरम्यान डीजे-डॉल्बीचा वापर आणि अनावश्यक बॅनरबाजी टाळून साधेपणाने, शिस्तबद्ध पद्धतीने केलेले आयोजन तसेच प्रतिष्ठानच्या माध्यमातून वर्षभर राबविण्यात येणारे विविध सामाजिक व सांस्कृतिक उपक्रम यांची दखल घेत हा पुरस्कार जाहीर झाल्याची माहिती मंडळाच्या वतीने देण्यात आली.
सोलापूर शहर पोलीस आयुक्तालयाच्या वतीने गणेशोत्सव काळात शांतता, कायदा व सुव्यवस्था राखण्यास सहकार्य करणाऱ्या तसेच सामाजिक आणि पर्यावरणपूरक उपक्रम राबविणाऱ्या गणेशोत्सव मंडळांना प्रोत्साहन देण्याच्या उद्देशाने पुरस्कार व सन्मान दिले जातात. याच पार्श्वभूमीवर राजमुद्रा युवक प्रतिष्ठानला प्रथम क्रमांकाचा पुरस्कार जाहीर झाल्याने मंडळाच्या सदस्यांमध्ये आनंदाचे वातावरण आहे.
१९४२ पासून सामाजिक कार्याची परंपरा
राजमुद्रा युवक प्रतिष्ठानची स्थापना १९४२ साली मिल कामगारांनी केली होती. आज हे मंडळ ८४व्या वर्षात पदार्पण करीत असून, लक्ष्मी पेठ परिसरात मिल कामगारांचे मंडळ म्हणून त्याची स्वतंत्र ओळख आहे. मंडळाच्या माध्यमातून विविध क्षेत्रांत कार्यरत असलेल्या अनेक कार्यकर्त्यांनी सामाजिक योगदानाची परंपरा पुढे चालू ठेवली आहे. डॉक्टर, राजकारणी, सनदी लेखापाल (सीए), वकील, बिल्डर आणि कीर्तनकार अशा विविध क्षेत्रांत मंडळाशी संबंधित कार्यकर्ते कार्यरत आहेत.
स्थापनेपासूनच सामाजिक बांधिलकी जपत गरीब, गरजू आणि वंचित घटकांना मदतीचा हात देण्याचे काम मंडळाकडून केले जात आहे. केवळ गणेशोत्सवापुरते मर्यादित न राहता वर्षभर समाजोपयोगी उपक्रम राबविण्यावर मंडळाचा भर असतो.
दिव्यांग, रुग्ण, विद्यार्थी आणि महिलांसाठी विविध उपक्रम
मंडळाच्या वतीने दिव्यांग व्यक्तींना मोफत सायकल वाटप, मोफत मोतीबिंदू शस्त्रक्रिया शिबिर, आरोग्य तपासणी शिबिर, कोविड प्रतिबंधक लसीकरण शिबिर, रक्तदान शिबिर आणि मोफत एसटी बस स्मार्ट कार्ड शिबिर असे विविध उपक्रम राबविण्यात आले आहेत.
शालेय विद्यार्थ्यांना मोफत शालेय साहित्याचे वाटप करून शैक्षणिक मदतीचा हात दिला जातो. महिलांना आर्थिकदृष्ट्या स्वावलंबी बनविण्याच्या उद्देशाने मोफत शिवणकला प्रशिक्षण आणि ब्युटी पार्लर कोर्सचे आयोजन केले जाते. या उपक्रमांमुळे विविध सामाजिक घटकांना लाभ मिळत असल्याचे मंडळाच्या कार्यातून दिसून येते.
सामाजिक आणि सांस्कृतिक कार्यक्रमांनाही प्राधान्य
सर्व महापुरुषांच्या जयंती उत्सवांसह स्वातंत्र्यदिन, प्रजासत्ताक दिन आणि महाराष्ट्र दिन साजरा करणे, वृक्षारोपण, कीर्तन-भजन, लहान मुलांसाठी विविध खेळ आणि महिलांसाठी ‘होम मिनिस्टर’ यांसारखे कार्यक्रम मंडळाकडून वर्षभर आयोजित केले जातात. सामाजिक जाणीव, सांस्कृतिक परंपरा आणि नव्या पिढीमध्ये चांगले संस्कार रुजविण्याचा प्रयत्न या उपक्रमांतून केला जातो.
विशेष म्हणजे, या उपक्रमांसाठी मंडळाचे सदस्य वैयक्तिक सभासद वर्गणी जमा करून आर्थिक योगदान देतात. कार्यकर्ते निर्व्यसनी असून वारकरी संप्रदायाशी जोडलेले आहेत. समाजहिताचे कार्य पुढेही याच पद्धतीने सुरू ठेवण्याचा निर्धार मंडळाच्या सदस्यांनी व्यक्त केला आहे.
साधेपणा, शिस्त आणि समाजसेवेचा गौरव
गणेशोत्सवात अनावश्यक खर्च, दिखाऊपणा आणि बॅनरबाजी टाळून सामाजिक कार्याला प्राधान्य देण्याची भूमिका राजमुद्रा युवक प्रतिष्ठानने घेतली. या भूमिकेला मिळालेली पुरस्काराची दखल ही मंडळाच्या सदस्यांसाठी अभिमानाची बाब मानली जात आहे.
‘सर्वांच्या सहकार्यामुळे हे शक्य झाले,’ अशी भावना व्यक्त करीत मंडळाच्या वतीने सर्व सदस्य, कार्यकर्ते आणि सहकार्य करणाऱ्यांचे आभार मानण्यात आले. पुरस्कार जाहीर झाल्याबद्दल राजमुद्रा युवक प्रतिष्ठानच्या सर्व सदस्यांचे विविध स्तरांतून अभिनंदन होत आहे.
गणपती बाप्पा मोरया! मंगलमूर्ती मोरया!
दिनप्रभा न्यूज पोर्टल व न्यूज चॅनेल
सत्य • समाज • संस्कार




