मंगळवेढ्यातील दुष्काळी खुपसंगीकरांचा जलसंकल्प; पाणी आले तर आमदार समाधानदादा आवताडे यांच्यावर हेलिकॉप्टरमधून पुष्पवृष्टी!

खुपसंगीकरांचा २०२९ चा ऐतिहासिक संकल्प! शेताच्या बांधापर्यंत पाणी पोहोचल्यास हेलिकॉप्टरमधून होणार पुष्पवृष्टी!
आमदार समाधानदादा आवताडे यांच्या वाढदिवसानिमित्त ग्रामदैवत श्री कामसिद्धाला दुग्धाभिषेक; हारतुरे नको, बळीराजाच्या सुख-समृद्धीसाठी ग्रामस्थांचे साकडे!
मंगळवेढा | दिनप्रभा प्रतिनिधी
वाढदिवस म्हटला की हारतुरे, सत्कार आणि शुभेच्छांचा वर्षाव असे चित्र सर्वत्र पाहायला मिळते. मात्र, खुपसंगी येथील ग्रामस्थांनी आमदार समाधानदादा आवताडे यांचा वाढदिवस एका आगळ्यावेगळ्या सामाजिक उपक्रमातून साजरा करत सर्वांचे लक्ष वेधून घेतले आहे. बळीराजा सुखी व्हावा, दुष्काळी भागातील शेतीला पाणी मिळावे आणि मंगळवेढा उपसा सिंचन योजनेचे पाणी २०२९ पर्यंत प्रत्येक शेताच्या बांधापर्यंत पोहोचावे, यासाठी ग्रामदैवत श्री कामसिद्धाला दुग्धाभिषेक घालून ग्रामस्थांनी साकडे घातले.
यावेळी २०२९ पर्यंत प्रत्येक शेताच्या बांधापर्यंत पाणी पोहोचविण्याचे स्वप्न पूर्ण झाल्यास श्री कामसिद्ध यात्रेत देवाच्या पालखीवर तसेच आमदार समाधानदादा आवताडे यांच्या भव्य मिरवणुकीवर हेलिकॉप्टरमधून पुष्पवृष्टी करण्याचा निर्धार खुपसंगी ग्रामस्थांनी दुष्काळी २४ गावांच्या वतीने व्यक्त केला. अशी माहिती पाणी संघर्ष समितीचे निमंत्रक कृषिभूषण अंकुश पडवळे यांनी दिली.
मंगळवेढा तालुक्यात यंदा दुष्काळी परिस्थितीमुळे शेतकरी आणि पशुपालक मोठ्या संकटाचा सामना करत आहेत. पिके जगविणे, जनावरांसाठी चारा-पाण्याची व्यवस्था करणे, अशा अनेक समस्यांनी शेतकरी त्रस्त आहेत. अशा परिस्थितीत वाढदिवसाचा अनावश्यक गाजावाजा न करता खुपसंगी ग्रामस्थांनी बळीराजाच्या सुख-समृद्धीला प्राधान्य देत हा धार्मिक आणि सामाजिक उपक्रम राबविला.
२०२९ चा संकल्प; पाणी आले तर हेलिकॉप्टरमधून पुष्पवृष्टी!
या कार्यक्रमातील सर्वाधिक चर्चेचा विषय ठरला तो म्हणजे ग्रामस्थांनी घेतलेला २०२९ चा संकल्प! आमदार समाधानदादा आवताडे यांनी २०२९ पर्यंत शेतकऱ्यांच्या प्रत्येक शेताच्या बांधापर्यंत पाणी पोहोचविण्याचे काम पूर्णत्वास नेल्यास, श्री कामसिद्ध यात्रेत देवाच्या पालखीवर आणि आमदारांच्या भव्य मिरवणुकीवर हेलिकॉप्टरमधून पुष्पवृष्टी करण्यात येणार असल्याचा निर्धार ग्रामस्थांनी केला.
हा संकल्प केवळ पुष्पवृष्टीपुरता मर्यादित नसून दुष्काळी भागातील शेतकऱ्यांच्या मनातील पाण्याच्या प्रश्नाची तीव्रता आणि जलसमृद्धीच्या स्वप्नाची जाणीव करून देणारा आहे. शेताच्या बांधापर्यंत पाणी पोहोचल्यास शेतीला नवसंजीवनी मिळेल, गावाचे अर्थकारण बदलेल आणि बळीराजाच्या आयुष्यात आनंदाचे दिवस येतील, अशी अपेक्षा ग्रामस्थांनी व्यक्त केली.
यावेळी श्री कामसिद्ध मंदिराचे पुजारी नवनाथ श्रीराम यांच्या हस्ते धार्मिक विधी पार पडले.
शेतकऱ्यांच्या बांधापर्यंत पाणी पोहोचविण्यासाठी प्रयत्नशील – दिपालीताई ताड
यावेळी पंचायत समितीच्या सभापती दिपालीताई ताड म्हणाल्या की, खुपसंगी ग्रामस्थांनी श्री कामसिद्ध देवाच्या चरणी केलेली प्रार्थना आणि २०२९ पर्यंत प्रत्येक शेताच्या बांधापर्यंत पाणी पोहोचावे, हा घेतलेला संकल्प निश्चितच प्रेरणादायी आहे. दुष्काळामुळे शेतकरी आणि पशुपालक अडचणीत आहेत. ग्रामस्थांच्या भावना आणि शेतकऱ्यांच्या व्यथा आमदार समाधानदादा आवताडे यांच्यापर्यंत पोहोचवून शेतकऱ्यांच्या बांधापर्यंत पाणी पोहोचविण्यासाठी आम्ही प्रयत्नशील राहू.
बळीराजाच्या जीवनात जलसमृद्धी यावी – करुणाताई शिवशरण
जिल्हा परिषद सदस्या करुणाताई शिवशरण म्हणाल्या की, दुष्काळी परिस्थितीत खुपसंगी ग्रामस्थांनी स्वतःच्या सुखापेक्षा बळीराजाच्या जगण्याला प्राधान्य देत कामसिद्ध देवाला घातलेले साकडे महत्त्वाचे आहे. शेतकऱ्यांना तात्पुरता दिलासा न मिळता त्यांच्या शेतात कायमस्वरूपी पाण्याची सोय व्हावी, ही काळाची गरज आहे. ग्रामस्थांचा २०२९ चा संकल्प आमदार समाधानदादा आवताडे यांच्यापर्यंत पोहोचवून दुष्काळी भाग हिरवागार करण्यासाठी प्रयत्न केले जातील.
यावेळी उद्योजक जनार्दन शिवशरण, माजी उपसरपंच दादा ताड, उपसरपंच प्रकाश भोसले, माजी सरपंच शहाजान पटेल, नेना चौगुले, ग्रामसेविका राखी जाधव, मरीआई माता मंदिराचे पुजारी बाजीराव मरीआईवाले, पत्रकार दादासाहेब लवटे, माजी सरपंच शिवाजी टकले, यात्रा कमिटीचे पंच दत्ता लवटे, तानाजी मासाळ, बाळू माळी, ग्रामपंचायत सदस्य लहू लवटे, आनंद पडवळे, आनंद बंडगर, कल्याण टकले, कैलास चौगुले, तुकाराम माळी, धनाजी माळी, यशवंत सलगर, पुतळाप्पा चौगुले, लखन भोसले, दिनेश लुगडे, दिगंबर आलदर, आनंदा बंडगर, गजानन चौगुले यांच्यासह खुपसंगी येथील अनेक ग्रामस्थ उपस्थित होते.
विशेष : हारतुरे नको, बळीराजाच्या समृद्धीसाठी देवाला साकडे!
आमदार समाधानदादा आवताडे यांच्या वाढदिवसानिमित्त खुपसंगी ग्रामस्थांनी हारतुरे आणि गाजावाजा टाळून ग्रामदैवत श्री कामसिद्धाला दुग्धाभिषेक घातला. दुष्काळी भागातील शेतकऱ्यांच्या वेदना आणि पाण्याची गरज या उपक्रमातून अधोरेखित झाली. त्यामुळे ग्रामस्थांचा हा उपक्रम परिसरात चर्चेचा विषय ठरला आहे.
दिनप्रभा मंगळवेढा तालुका प्रतिनिधी : श्री. विक्रम यादव
संपादक : श्री. डॉ. किरण दिनकर बोधले
===========================
खुलासा : ही बातमी उपलब्ध माहितीच्या आधारे तयार करण्यात आली आहे. बातमीतील कोणत्याही तथ्यात्मक त्रुटी किंवा तक्रारी असल्यास वाचकांनी dinprabhanews@gmail.com या ईमेलवर कळवाव्यात. दिनप्रभा न्यूज योग्य पडताळणी करून आवश्यक ती दुरुस्ती करेल.
टीप : बातमीसोबत वापरण्यात आलेले AI निर्मित ग्राफिक्स असल्यास ते केवळ प्रातिनिधिक स्वरूपाचे आहेत.




